BR LA UNION – Immadu ti breedings sites dagiti lamok a carrier ti dengue virus ditoy probinsiya ti La Union kangrunaanna idiay ili ti Bagulin ken siyudad ti San Fernando, makagapo ti kellaat a panagngato ti dengue cases.
Imbinsa-binsa ni Dr. Herminigildo M. Velasco, Provincial Health Officer II ditoy La Union, iti sumagmamano a factors nu apay a ngimmato ti kaso ti dengue, maibasar iti insayangkat da a panagadal.
Umuna ti imbaga na nga immadu ti pagum-umokan dagiti lamok nga Aedes Aegypti ita a panawen ti panagtutudo.
Maikadwa, improper water storage ken uray iti saan a nasayaat a pannakaibelleng dagiti basura (improper waste disposal).
Dagiti maurnong ken saan a magar-garaw a danum manipud ti tudo iti kangrunaan a pagumokan dagiti lamok a dengue carrier.
Impaganetget ni Dr. Velasco a masungbatan laeng ti nasao a parikut seknan iti kaso ti dengue nu ugalien ti amin nga agdalus iti uneg ken arubayan ti pagtaengan ken adda met laeng ti tulong ken panagtignay ti amin a barangay ken maseknan nga opisina, a mangipatungpal kadagiti addang a mangpukaw iti breeding sites dagiti lamok a mangigubway ti sakit nangruna ti dengue.
Maibasar iti naudi a Dengue Weekly Surveillance Update ti Provincial Epidemiology and Surveillance Unit (PESU) ti Provincial Government ti La Union, 93 ti baro a kaso a nailista iti uneg laeng ti makalawas, manipud Hunyo 28 agingga Hulyo 4, 2026.
Iti pakabuklan, umaboten ti 1,005 ti nailista a kaso ti dengue ditoy La Union manipud Enero 4 agingga Hulyo 4, 2026 nangatngato ti 24.23% kumpara iti nailista a kaso iti kapada a panawen idi 2025.
Kaadwan a kaso ti dengue ket nailista idiay ili ti Bagulin nga addaan ti 251 a kaso, rason tapno ideklara ti dengue outbreak iti nasao nga ili.
Maikadwa ti City of San Fernando (160); Bacnotan (83); Rosario (58), ken Aringay (54).
Agtawen ti 87 iti kalakayan a nakaptan ti sakit idinto a nababbaba ngem one-year old ti kaubingan a biktima ti sakit a dengue ditoy probinsiya ti La Union.
