Nakairekord iti Department of Health (DOH) ti pakabuklan nga 8,171 a kaso ti dengue manipud Hulyo 6 agingana Hulyo 19 ti agdama a tawen.
Segun iti ahensiya, nabab-baba daytoy ti 33% maiyarig iti nairecord a kaso iti maudi a lawas ti Hunyo 22 agingana Hulyo 5 nga adda iti 12,166 a kaso ti dengue.
Ikonkonektar dagiti nagsasaruno a kalamidad a dimuprak iti pagilian iti panakailista ti rinibo a kaso ti dengue kadagiti napalpalabas a bulan.
Kabayatanna, gapo iti daytoy ket nainget a nakabantay iti ahensiya kadagiti mairekrekord a kaso ti dengue kadagiti nadumaduma a lugar iti sapasap a pagilian.
Nagbalakad met iti ahensiya a saan nga agpakampante iti pangta ti dengue, panawen man ti kalgaw wenno panagtutudo. Malaksid iti daytoy ket ugalyen nga aramiden iti 4Ts wenno taob, taktak, tuyo, ken takip tunggal alas-kwatro ti malem tapno maikkat dagiti pagik-iklogan dagiti lamok kangrunaan ita a panawen ti panagtutudo.#
