Ilunglungalong ti Department of Health (DOH) kadwa na iti Department of Finance (DOF), nga i-update ken papigsaen iti agdama a Sweetened Beverages (SB) tax tapno makissayan dagiti pangta iti salun-at a gapwanan iti nasam-it a mainom.
Sakopen ti nasao nga addang dagiti mainom nga addaan ti asukar wenno non-sugar sweeteners, kas iti softdrinks, ready-to-drink coffee ken iced tea, packaged juice drinks, flavored milk, yogurt drinks, ken electrolyte drinks.
Segun kadagiti otoridad, ti masansan a panagkonsumo kadagiti nasao a produkto ket adda direkta a pakainaiganna iti nangato a peligro iti nalabes a kinalukmeg ken sobra a kinadagsen, pannakadadael ti ngipen ken type 2 diabetes.
Nairanta ti nasao nga addang a maingato ti buwis iti presyo kadagiti nasao a mainom tapno epektibo a makissayan iti panagkonsumo ti publiko kadagiti produkto a mangparnuay ti naduma-duma a sagubanit.
