Nagbalinen a dakkel a pakaseknan ti dadduma nga umili ti kinakurang ti suplay ti danum, nga epekto pay laeng ti El Niño.
Maysa kadagiti kangrunaan ken alternatibo a pagtataudan iti suplay a danum dagiti residente ditoy probinsiya ket iti bubon ken palpal (natural springs wenno water seeps).
Binalakadan ni Dr. Herminigildo M. Velasco, Provincial Health Officer II ti Provincial Health Office (PHO), iti panagannad ti publiko no agusar wenno agkonsumo iti danum manipud kadagiti nasao a water sources, agsipudta mabalin nga agtungpal iti nadumaduma a sakit no saan a natalged wenno nadalus ti inumen a danum.
Segun kenni Dr. Velasco, no ti danum manipud iti bubon wenno palpal a mausar a mainum, masapul nga umuna a masigurado ti kinatalgedna babaen ti umno a disinfection.
Karaman kadagiti rekomendasyonna ket iti panang-nayon ti umiso a chlorine wenno panangpaburek iti danum iti saan a kumurang ti maysa a minuto sakbay nga inumen.
Impaganetgetna pay ti kinapateg ti responsable a panangusar ti danum tapno masalakniban Iti salun-at ti tunggal pamilYa, nangruna ita nga agkurkurang ti suplay ti danum gapu iti nakaro a pudot.
