BR LA UNION – Nakailista ti Department of Health (DOH) ti dandani triple a panagngato iti kaso ti hand, foot and mouth disease sipud idi Enero dos agingga Pebrero 22, agdama a tawen.
Maibasar iti datos ti ahensya, adda pakabuklan a bilang a 7,598 a kaso ti HFMD manipud iti nasao a petsa.
Daytoy ket dandani mamitlo a daras a ngimmato manipud iti bilang a 2,665 nga HMFD cases idi napan a tawen iti kapada a timeline.
52% kadagitoy ket manipud iti rehioyon ti Central Luzon, Mimaropa, National Capital Region (NCR) ken Cordillera Administrative Region (CAR).
Adda pakabuklan a bilang a 4,225 wenno kaibatugan ti 56% ditoy agtutubo nga agtawen ti uppat agpababa bayat a 2,069 dagiti adda ti baetan ti tawen a singko agingga 9-anyos.
Nupay man-mano dagiti gundaway a makapatay iti HMFD ken agimbag iti nasao a sakit, nagpalagio ti DOH iti publiko a napartak iti panagwaras ti nasao a sakit isunga ugalien iti agugas ti ima a rumbeng nga agpaut ti 20 segundo babaen ti sabon ken danum.
Nasken a lumiklik kadagiti indibidwal a nakitaan ti sintomas wenno nagpositibo ti HMFD.
Kabayatanna, palagip ti departamemnto a kumonsulta a dagus nu makarikna kadagiti sintomas kas ti panaggurigor, panaguyek, panateng, mouth sores, blisters iti ima ken saka
Dagiti suspected wenno confirmed cases ket nabalakadan a saan pay laeng a rumwar iti balay ken saan met a sumrek iti eskwelaan wenno trabaho.
