BR LA UNION – Mangisayangkat ti Department of Trade and Industry (DTI) La Union Provincial Office iti nadumaduma nga aktibidad a mangitandudo iti lokal nga industriya ti cacao, mangsuporta kadagiti cocoa farmers, ken addang a mangsalaknib iti aglawlaw, kas pannakikaysa iti pannakarambak ti World Chocolate Day 2026 inton Hulyo 7, 2026.
Iyaw-awis ti DTI La Union iti publiko a sumarungkar iti Provincial Office inton Hulyo 7, agsipudta mangipaayda ti libre a hot chocolate drink a naaramid manipud iti mula a cacao ditoy La Union, agraman pastries.
Tarigagay ti ahensiya a maiyam-ammo kadagiti ad-adu pay a konsumer dagiti de kalidad a produkto a cacao ti probinsiya ken mapapigsa ti suporta para kadagiti lokal a mannalon ti cacao, processors, ken iti biang ti micro, small, and medium enterprises (MSMEs).
Kagiddan daytoy, mangisayangkat pay ti DTI La Union iti Cacao Tree Planting Activity idiay Barangay Nagtagaan, Rosario, La Union.
Segun iti DTI La Union, ti pannakarambak ti World Chocolate Day ket saan laeng a panangbigbig iti paborito a taraon ti kaadwan, ngem ketdi gundaway pay daytoy tapno padayawan dagitio cacao farmers ken dagiti sektor nga agtitinnulong a mangpadur-as iti lokal nga industriya.
