BR LA UNION – Nalpasen ti Forensic Group ti Philippine National Police (PNP) iti imbestigasyon na seknan iti napasamak a pammaltog idiay Senado idi Mayo 13, ken insumite dan ti report iti PNP-Criminal Investigation and Detection Group (PNP-CIDG).
Segun kenni PNP Forensic Group Director Col. Pierre Paul Carpio, maitunos ti amin nga anggulo iti lugar a nakapasamakan ti krimen ken iti matching ti naduma-duma nga ebidensiya.
Impakita pay ti opisyal iti 3D scanning a naaramid iti kangitingitan ti insidente ken trajectory wenno direksyon dagiti bala iti hallway.
Rimwar iti imbestigasyon, nga amin nga abut a limsutan ti bala ket nagtaud iti gunshot manipud iti mismo nga uneg ti pasdek.
Iti panangamiris iti crime scene, nagusar ti grupo ti “blue box” tapno ipakita ti pakabuklan a nakapasamakan ti krimen ken kasatno a naaramid ti Scene of the Crime Operations (SOCO).
Immuna nga inruar ti CIDG iti maysa a CCTV footage a mangipak-pakita kenni suspended Senate Sergeant-at-Arms Mao Aplasca nga immuna a nagpaputok ti paltog, a nagbalin a rason tapno bumales met ti putok dagiti kameng ti National Bureau of Investigation (NBI).
Sumagmamano nga oras kalpasan ti riribok, pimmanawen iti premises ti Senado ni Senador Ronald “Bato” dela Rosa, kalpasan a temporaryo a nagpakustodiya iti tengnga ti sangsangwenna nga arrest warrant manipud International Criminal Court (ICC).
