BR LA UNION – Impatungpal ti Department of the Interior and Local Government (DILG) ti direktiba iti sidong ti Memorandum Circular 2026-066 a nairuar idi Enero 29, seknan iti panangipawil a kabilan ti nagan, ladawan, imahe, slogan, logo, inisyal ken dadduma pay a simbolo a mabalin a maikonektar iti siasinuman nga opisyal ti gobyerno kadagiti proyekto ken karatula ti gobyerno.
Impaganetget ti DILG a dagiti programa a pinonduan ti gobyerno ket naggapo iti buwis dagiti umili ken saan a rumbeng nga usaren kas personal nga instrument iti panag-pulitika, isunga binilin ti ahensya nga ikkaten a dagus dagiti makit-kita a materyales, gaputa mailabsing iti allagaden.
Mainaig ti daytoy, nangipeksa ni Senate President Pro Tempore Panfilo “Ping” Lacson ti panangsuporta iti direktiba ken impaganetget na a saan a maiparbeng iti serbisyo publiko dagiti billboard ken karatula a naglaun ti rupa ken nagan dagiti pulitiko, agsipudta agserserbi a wagas daytoy iti panang-tagikua ti kredito ken mabalin a mangipasimudaag ti kinakusit wenno nalabes a panaggastos, saan laeng nga iti mismo a proyekto ngem uray kadagiti karatula a pakaipas-paskilan ti rupa ken nagan ti pulitiko.
Innayon pay ti senador, iti nasyunal a budget ket rumbeng nga agserbi iti interes ti publiko ken saan nga aramiden nga instrumento para iti bukod a pagimbagan dagiti adda iti turay.
Impaganetget na pay ti nabayagen nga ilunglungalong na kontra “epal”, kabilang ti panagikabil ti mas nalawlawag a safeguards iti 2026 national budget tapno maliklikan iti political patronage ken panagabuso iti pondo ti ili.
