Immatiddog pay ti listaan dagiti indibidwal ken nabibileg a personalidad ti intero a lubong a posible a mairaman ti imbestigasyon seknan ti dokumento ti mapapati a nagbekkel a financier ken convicted sex offender a ni Jeffrey Epstein.
Kalpasan nga iruar ti gobierno ti Estados Unidos dagiti baro a dokumento idi Enero 30 iti maaw-awagan kas “Epstein Files,” dimmanon ti tallo-milyon-a-pinanid dagiti papeles iti naibutaktak a naglaon kadagiti 108,000 a sensitibo a ladawan, nasurok 2k a videos, emails, mensahe, travel records, ken bank records.
Karaman kadagiti nadakamat ket dagiti bilyonaryo nga isuda Elon Musk ken Bill Gates, ti negosyante a ni Richard Branson, US President Donald Trump ken Bill Clinton, adu nga opisyales ti nagduduma a pagilian, akademiko, ken celebrities.
Makita pay iti email iti saritaan da Elon Musk ken Jeffrey Epstein idi tawen 2012 nga adda pakainaigan na ti maysa nga “Island Party”.
Pinaglibakan met daitoy ni Musk ken kinuna a pulos a saan isuna a napnapan iti nasao a pribado nga isla, kasta met nga impaganetget iti kinapateg iti panagimbestigar kadagiti umno a karaman iti krimen.
Kaadwan met kadagiti pannakadakamat iti nagan ni US President Donald Trump ket saan a beripikado, nu sadinno ket ginasut a daras a mabasa ti nagan na, segun iti Federal Bureau of Investigation.
Inlawlawag ti US Department of Justice a ti pannakadakamat kadagiti nagnagan iti Epstein Files ket saan nga otomatiko a pakaibatugan iti ilegal nga aramid.
Ti pannakaibutaktak dagiti papeles ket kasaruno ti Epstein Files Transparency Act a pinermaan metlaeng ni US President Donald Trump idi bulan ti Nobiembre.
Nupay kasta, dinillaw dagiti mamanday-linteg manipud Democratic ken Republican parties nga adda latta dagiti dokumento iti saan nga inruar ti administrasyon.
Agtultuloy ti panawagan dagiti biktima ti human trafficking network ni Epstein para ti sibubukel a transparency, accountability, ken hustisya.
