BR LA UNION – Kinumpirma ni Senate President Pro Tempore Panfilo “Ping” Lacson a kabilang ni sigud a House Speaker Martin Romualdez kadagiti nairekomenda a makaswan, iti draft report ti Senate Blue Ribbon Committee seknan iti maipagarop nga anomalya iti pondo para iti flood control projects.
Inlawlawag ni Lacson a kabilang ni Romualdez iti maikadwa a kategorya dagiti personalidad a nadakamat iti panagdengngeg, maibasar iti rimwar a testimonya dagiti testigo ngem awan ti direkta nga ebidensya a mangipak-pakita nga immawat dagitoy ti kuwarta.
Kinuna na a nupay inakusaran ti surprise witness a ni Orly Guteza, a maipagarop a nag-deliver ti kuwarta kada Zaldy Co ken Romualdez, awan ti naipakita a pammaneknek wenno direkta nga ebidensya nga immawat ti kickback ti sigud nga House Speaker.
Malaksid dayta, nadakamat pay idiay Senado dagiti alegasyon a mangiram-raman kenni Romualdez kadagiti contractor nga isuda Sarah ken Curlee Discaya, a makunkuna a nausar kas “front” iti panaggatang ti maysa a high-end a sanikua idiay Makati City.
Nupay kasta, impaganetget ni Lacson nga awan ti naisumite a direkta nga ebidensya iti panagdengngeg a mangpaneknek kadagiti nasao nga akusasyon kontra kenni Romualdez.
Kabayatanna, imbaga ni Lacson a mangisayangkat ti panagtataripnong dagiti senador manipud majority bloc tapno talantanen dagiti isyu seknan ti draft report ti Blue Ribbon Committee, partikular iti maipagarop a kaawan ti pirma wenno partisipasyon ti uray siasino a miyembro ti minority bloc.
Kinuna na a napateg nga adda mangibagi manipud minority, nangruna iti minority leader, tapno agtalinaed ti kredibilidad ken integridad ti report sakbay a naan-anay a pasingkedan ti Senado.
