BR LA UNION – Pormal nga inserbi dagiti kameng ti Criminal Investigation and Detection Group (CIDG) iti arrest warrant kontra kenni sigud a House Speaker ken Leyte Rep. Martin Romualdez bayat a naka-confine iti Cardinal Santos Medical Center idiay San Juan City idi rabii, Setyembre 7, 2026.
Adda pakainaiganna daytoy iti naidatag a ₱7.4-bilyon a kaso a plunder kenni Romualdez seknan iti maipagarop nga anomalya kadagiti proyekto ti gobyerno.
Agarop alas-4 ti malem idi kalman, Lunes, ket naiturong ken na-admit ni Romualdez iti ospital gapu iti maipagarop a “cardiovascular event,” saan nga stable a blood pressure, ken anxiety attack.
Personal met a nagturong iti ospital da Department of the Interior and Local Government (DILG) Secretary Jonvic Remulla ken dagiti kameng ti Philippine National Police-Criminal Investigation and Detection Group (PNP-CIDG) tapno idatag ti warrant nga inruar ti Sandiganbayan Third Division.
Kalpasan a mabasaan ti karbengan iti sango dagiti abogado na ken maipasidong iti booking procedures, opisyal isuna itan a maibilang a Person Deprived of Liberty (PDL) iti sidong ti nairut nga armado a panagbantay.
Nangidatag ti kampo ni Romualdez ti mosyon idiay korte tapno kiddawen nga itultuloy ti hospital arrest bayat a mabanbantayan iti salun-at na agingga nga agbalin a fit a sumango iti Sandiganbayan.
Siniguro met ti gobyerno a dagus a maiyakar ni Romualdez iti pasilidad ti pagbaludan idiay Quezon City Jail idiay Payatas apaman a mangipaay ti clearance dagiti medical experts a mabalinen daytoy a rumwar iti ospital.
