BR LA UNION – Inaprubaran ni Presidente Ferdinand R. Marcos Jr. iti 21 a priority measures ita nga aldaw ti Martes, Pebrero 10, 2026 iti naisayangkat a 3rd Legislative-Executive Development Advisory Council (LEDAC) Full Meeting iti 20th Congress, a target a maipasa sakbay ti Hunyo ita a tawen.
Dagiti 21 a singasing linteg ket addaan ti tarigagay a palag-anen iti bakbaklayen dagiti umili ken papigsaen iti proteksyon, transparency, ken accountability iti gobyerno.
Kabilang dagiti prayoridad a gakat ket iti Travel Tax Abolition, Expanded Anti-Online Sexual Abuse or Exploitation of Children and Anti-Child Sexual Abuse or Exploitation Materials Act of 2026, dagiti gakat kontra fake news ken digital disinformation, ken ti BARMM Elections tapno masiguro iti naurnos ken napudno nga eleksiyon.
Impaganetget pay ti Presidente iti kinapateg ti panangipasa ti Anti-Political Dynasty Law, CADENA Act, Independent People’s Commission Act, ken Party-List System Reform Act kas paset ti mas nalawlawa a panangikagumaan a maurnos iti sistema ken siguradwen a napigpigsa ti boses dagiti umili.
Iti pakabuklan, kumpiyansa ti Presidente a dagiti nasao a gakat ket mapasingkedan kas naan-anay a linteg, nga addaan ti nalawag nga epekto ken pudno a pagnumaran dagiti umili a Pilipino.
