BR LA UNION – Naawaten ti Senate Impeachment Court, babaen ti Office of the Clerk of Court, dagiti dokumento a naidatag idi kalman, Huwebes, Hulyo 30, 2026, kas panangtungpal kadagiti subpoena para iti financial records ni Vice President Sara Zimmerman Duterte, ti asawana a ni Atty. Manases R. Carpio, ken duapulo (20) nga entidad a nailanad kadagiti subpoena.
Maibasar iti report, dagiti dokumento ket insubmitir ti Bureau of Internal Revenue (BIR) ken sumagmamano a dadakkel a banko—a pakairamanan ti BDO Unibank, Philippine Savings Bank (PSBank), Metropolitan Bank & Trust Company (Metrobank), ken Security Bank Corporation.
Kabayatanna, agtultuloy ti panangawat ti Office of the Clerk of Court kadagiti dokumento manipud kadagiti dadduma nga institusyon a sakopen ti subpoena.
Maipalagip nga iti napalabas a trial day ket natalantan ti isyu ti confidential funds ti Department of Education nga agbalor ti P112.5 milyon, a maipagarop a nai-release nga awan ti pormal nga endorsement para iti Special Disbursing Officer.
Manamnama nga agserbi a napateg nga ebidensiya dagiti naisubmitir a dokumento bayat nga agtultuloy ti impeachment proceedings kontra kenni Bise Presidente Duterte.
Tarigagay ti Senado nga amirisen amin a financial records tapno masiguro ti transparency ken sungsungbatan iti panagusar ti pondo ti gobyerno.
