Itantandudo ni Parañaque 2nd District Representative Brian Yamsuan ti pannakapapigsa ti art teaching kadagiti junior ken senior high school tapno mapatanor ti talento dagiti agtutubo ken dumakkel ti creative industry ti pagilian.
Segun kenni Yamsuan, makatulong dagiti digital platforms a mangpalawa iti creative industry, mangpataud iti panggedan ken mangpangato iti kita manipud iti panageksport kadagiti creative products.
Iti sidong ti House Bill 7864, tarigagay a mapalawa ken aramiden a moderno ti Special Program for the Creative Arts (SPCA) ti Department of Education (DepEd), pakairamanan ti pannakainayon ti arkitektura, pelikula, disenio, digital fabrication ken new media kadagiti subjects.
Maisuro pay ti financial literacy, entrepreneurship ken intellectual property rights tapno maisagana dagiti agtutubo para iti global creative industry kas animator, designer, filmmaker, musikero ken dadduma pay a propesional.
Maipasdek met ti SPCA Council a mangisilpo kadagiti pagadalan ken creative industries babaen ti mentorship, panagsanay, scholarship ken employment opportunities.
Karaman kadagiti miembro iti daytoy ti DepEd, National Commission for Culture and the Arts, Department of Trade and Industry, Cultural Center of the Philippines ken dadduma pay a mainaig nga ahensia.
Nailanad pay iti singasing ti panagala kadagiti espesial a mannursuro ken eksperto, pannakitinnulong iti pribado a sektor para iti panagsanay dagiti estudiante, tax exemption kadagiti buis ken grant, ken insentibo iti buis para iti panagangkat kadagiti alikamen a kasapulan ti creative industry.
