Tinakderan ni Education Secretary Sonny Angara a rumbeng nga ibasar iti performance ken kontribusyon iti publiko ti promosyon dagiti opisyal ken empleyado ti Department of Education (DepEd), saan ketdi nga iti koneksyon iti pulitika.
Inwaragawag daytoy ti sekretaryo kas paset iti mensahe na iti kaunaan a Literacy and Numeracy Expo cum Training of Trainers on the Institutionalization of Technical Assistance on Instructional Delivery a naisayangkat idiay Iloilo City idi Miyerkoles, Nobyembre 4.
Segun kenni Angara, napateg a mabigbig ken maipaayan ti maiparbeng nga oportunidad dagiti personnel a mangipakpakita ti siglat ken napudno a serbisyo publiko iti ahensiya.
Impaganetget na a ti naidumduma a panagserbi kadagiti umili ti kangrunaan a basaran iti panangbigig ken panangital-o iti posisyon ti tunggal empleyado.
Innayon ti sekretaryo nga awan ti lugar iti DepEd iti panagusar ti “backer” wenno pampulitika a koneksyon tapno laeng makaala ti promosyon.
Nairanta ti nasao nga allagaden a maital-o iti tukad ti propesyonalismo ken masiguro ti nangato a kalidad ti edukasyon para kadagiti agad-adal iti intero a pagilian.
