BR LA UNION – Pagsag-saganaen ni Sen. Bam Aquino iti education sector iti agbalin nga impact ti El Niño iti intero a pagilian.
Segun kenni Aquino, nasken a nasapa a saganaan iti nasao a sektor iti anyaman nga epekto ti nasao a weather phenomenon, nangruna iti panagadal dagiti estudyante.
Bayat a nasapa pay, imbilin ti senador iti Commission on Higher Education (CHED) ken Department of Education (DepEd) nga iplastar dagiti addang tapno maprotektaran dagiti estudyante ken mangisursuro manipud iti nakaru a kinabara ti panawen.
Maibasar iti inisyal a forecast ti state weather bureau, mabalin nga agpaut ti El Niño agingga iti umuna a quarter ti tawen 2027 wenno napapaut pay agingga iti maudi a tallo a bulan ti School Year 2026-2027
Impaganetget ti senador, rumbeng a siguradwen nga agtultuloy ti panagadal dagiti estudyante, laksid ti posibilidad dagiti serye ti class suspension wenno cancellation gaputi nabara a panawen.
Kabayatanna, binilin metten ni Education Secretary Sonny Angara dagiti eskwelaan ken local DepEd offices a mangisayangkat ti risk assessments, pasayaaten iti water ken ventilation systems, ken dadduma pay a nasken nga aramiden tapno makissayan ti nakaru nga epekto ti tikag.
Binilin na dagiti eskwelaan a mangisayangkat ti naannayas a transition iti alternative learning modalities iti panawen a nakaru unayen ti kinabara ti paniempo.
