Nagpanawagan iti Kilusang Magbubukid ng Pilipinas (KMP) ti dagus a subsidia kalpasan ti kabaruan a panagngato ti presio dagiti produkto ti petroleo a maikonkonektar iti kumarkaro a rinnupak idiay Middle East.
Segun ti KMP, nangipatungpal dagiti kompania ti lana ti panagngato ti presio iti tunggal litro ti gasolina, diesel, ken kerosene. Maika-10 daytoyen a panagngato ti diesel ken kerosene ken maikawalo ti gasolina ita a tawen.
Naipadamag met a nasurok nga $80 per barrel iti global crude prices ken mabalin a dumanon ti $100 no kumaro iti tension ken masinga iti panagayus ti lana idiay Strait of Hormuz, a pagdaldalanan iti dakkel a paset ti suplay ti lana iti lubong.
Segun kenni Danilo Ramos, chairperson ti KMP, tunggal piso a mainayon iti diesel ket dagus a mangkissay iti bassit a matgedan dagiti mannalon ken mabalin nga ad-adda a mangimameg kadakuada iti utang. Kinunana a maapektaran met dagiti mangmangged, mangngalap, sektor ti transportasion, ken dagiti consumers.
Gapu iti daytoy, impaganetget ti grupo iti dagus a pannakaipatungpal ti fuel subsidies ken suporta kadagiti farm inputs kas iti abono ken pestisidio tapno mapalag-an ti ngumatngato a gastos iti produksion.###
