BR LA UNION – Agtultuloy ti panagkapuy ti piso kontra dolyar kalpasan a mairekord ita nga aldaw, Marso 12, 2026, ti exchange rate a P59.38 kada US dollar, maysa kadagiti katamnayan a lebel ita a tawen.
Maibasar iti record manipud kadagiti banko ken financial monitoring firms, agtaltalinaed a napigsa ti panagkasapulan iti dolyar gapu iti napigsa nga ekonomiya ti Estados Unidos ken nangatngato nga interes iti merkadoda.
Ditoy Pilipinas, ti panagkapuy ti piso ket gapu iti panagngato ti presyo dagiti imported products, partikular ti lana, a direkta ti epektona iti plete ken magat-gatang.
Maibasar iti datos, dimmanon ti dolyar iti kangatuan a P59.50 idi Enero 14 ken bimmaba iti P57.53 idi Pebrero 25, sakbay a pimmigsa manen ita a Marso.
Ti average exchange rate ita a tawen ket adda iti P58.71, a mangipakpakita iti 0.86% a panagngato no idilig iti napalabas a tawen.
Kabayatanna, mabenipisyaran dagiti pamilya nga umaw-awat ti remittances manipud kadagiti Overseas Filipino Workers (OFWs) gaputa dakdakkel iti balor ti dolyar ngem ti piso.
Nupay kasta, para kadagiti lokal a konsyumer, marikna ti kanayunan a padagsen iti inaldaw a gastos.
Agtultuloy a banbantayan ti Bangko Sentral ng Pilipinas (BSP) iti sitwasyon ken mangir-iruar ti Daily Reference Exchange Rate Bulletin tapno adda giya iti merkado ken financial institutions.
