BR LA UNION – Maipagarop nga awan ti basaran iti kontrobersyal a waragawag ni Navotas Representative Toby Tiangco a ti rason a panangpa-impeach kenni VP Sara Duterte ket gaputa saan a maareglo ti 1 million percent.
Impaganetget ni House Committee on Public Order and Safety ken Manila 2nd District Rep. Rolan Valeriano, a ti laeng papel dagiti miyembro ti Kamara de Representantes ket desisyunan iti uppat nga impeachment complaint kontra iti bise presidente.
Sinubliyanan ti mammanday linteg iti panangidatag ti complaint kontra kenni VP Sara, a nangisayangkat ti Justice Committee iti serye ti panagdengngeg tapno madetermina nu adda iti umdas a porma, linaun, ken basaran dagiti nasao a reklamo.
Mamati ti Manila lawmaker a ti nagbalin a desisyon dagiti pada na a mammanday linteg ket maiyannurot iti linaun dagiti nasao a reklamo a saan ketdi nga anyaman nga isyu ti korapsyon a posible a pakairam-ramanan dagitoy.
Kinapudno na kunana, nakagalot ti ima dagiti mammanday linteg nu anya iti rules nga intuding ti nasao a komite, isunga saan a naingkalintegan nga akusaran isuda ti maysa a mammanday linteg a ti panagbotos da ket gapu iti posible a korapsyon.
Immunan a bimuwelta ti dadduma a miyembro idiay Kamara kenni Tiangco, kasaruno ti kontrobersyal a waragawag.
Iti immuna nga interviw ti Bombo Radyo kenni Bicol Saro Rep. Terry Ridon, kinuna na a dagiti nagbotos nga adda sufficient form, substance, ken grounds iti dua a reklamo kontra kenni VP Sara ket awan ti pakairam-ramanan da nga isyu ti korapsyon, saan a kas ti dadduma a mammanday linteg a mairam-raman iti flood control scandal ken dadduma pay nga isyu.
