Nangngegan idiay Vatican ti Filipino Prayer iti kangitingitan ti Dominggo de Ramos nga indauluan ni Pope Leo XIV sadiay Saint Peter’s Square.
Paset daytoy ti Prayers of the Faithful a nakasagid kadagiti Pilipino a timmabuno, kenadu kadakuada ti naglua.
Naipalagip iti kararag dagiti agsagsagaba ken agrigrigat, kasta met a naipaganetget ti pannakikaykaysa ni Cristo iti panagsagabada.
Impaganetget ti Santo Papa iti homilia na ti panagbalin nga Hari ti Kinakapia ni Hesus a mangilaksid iti kinaranggas ken innayon a saan koma nga ikalinteganen iti gubat ken panagsagaba.
Iti ngudo ti misa ket kinablaawanna dagiti matalek bayat ti panaglikmutna iti Saint Peter’s Square babaen ti popemobile.
Ti Domingo de Ramos ti panagrugrugi ti Nasantuan a Lawas, nu sadinno ket laglagipen dagiti Katoliko ti panagsagaba, ipapatay, ken panagungar ni Hesu-Kristo manipud iti pannakatay.
