Nagleppas iti voter registration ti kaunaan a Bangsamoro Parliamentary Elections (BPE) nga addaan ti nasurok 161K nga aplikasyon, nangatngati ngem iti target a 150K a baro a botante ti Commission on Elections (Comelec).
Maibasar ti datos, kinuna ti COMELEC a dimmanon ti pakabuklan a 161,429 dagiti nagparehistro nga agbotos para ti Bangsamoro Election. Kadaitoy a bilang, 78,972 ti babbai bayat a 82,457 met dagiti lallaki.
Nailista ti Lanao del Sur ti kangatoan a bilang dagiti rehistrado a dimmanon ti 50,918. Karaman ditoy dagiti 454 a registrants a nag-apply babaen ti Register Anywhere Program (RAP) sites.
Simmaruno met ti Maguindanao del Norte nga addaan ti 31,666; Maguindanao del Sur (26,175); ken Basilan (21,734.)
Iti met Special Geographic Area (SGA) sadiay Cotabato ket nakailista ti 16,505 a rehistrado, bayat a Tawi-Tawi ti kababaan ti rehistrado a 14,431, agramanen dagiti 623 nga aplikante a nagparehistro baben kadagiti RAP sites.
