BR LA UNION – Bimuwelta ni National Bureau of Investigation (NBI) Director Melvin Matibag kenni sigud a Comelec Commissioner Atty. Rowena Guanzon gaputi panangkuwestyon na iti operasyon kontra kenni Peanut Gallery Media Network (PGMN) founder Franco Mabanta ken dadduma pay.
Kinuwestyun ngamin ni Guanzon nu nangalaan ti kuwarta a nausar iti operasyon agsipudta naka-freeze iti account ni sigud nga House Speaker ken Leyte Rep. Martin Romualdez.
Sungbat ni Matibag, nagusar dagiti operatiba ti ‘marked money’ iti nasao nga operasyon.
Inlawlawag ti NBI chief, gagangay a wagas dagiti law enforcement agency iti panagusar ti marked money wenno maaw-awagan a ‘budol money’ iti entrapment operation.
Dagiti laeng genuine a kuwarta kunana ti maikabil iti rabaw dagiti bulto a kuwarta bayat a dagiti adda iti uneg ket bin-igen a peke a kuwarta.
Inlawlawag ti opisyal nga awan ti inruar nga aktwal a kuwarta ni Romualdez sakbay ti naisayangkat nga operasyon.
