BR LA UNION – Kinumpirma ni Department of the Interior and Local Government (DILG) Secretary Jonvic Remulla a natalged ni Senador Ronald “Bato” dela Rosa ken adda kadwa na a security personnel kasaruno ti tensiyon ken lockdown iti pasdek ti Senado.
Iti pannaki-sango na iti media idiay Senado, imbaga ti sekretaryo a naipaka-ammo kenni Dela Rosa nga adda da idiay Senado tapno i-secure ti integridad ti Senado ken protektaran ti amin a senador nga adda iti pasdek.
Siniguro pay ni Remulla kenni dela Rosa a saan da nga arestaren daytoy.
Immuna ti daytoy, nagkakaribuso idiay Senado kalpasan a nangngegan ti nagsasaruno a putok ti paltog idi rabii ti Miyerkules, Mayo 13, bayat a naka-lockdown ti Nangato a Pagpandayan Linteg, ken agdama a nakaipasidong iti protective custody ti senador.
Segun kenni Remulla, madaman a maim-imbestigaran iti pakabigbigan dagiti adda iti likod ti serye ti panag-putok ti paltog.
Napasamak ti tensiyon idiay Senado kalpasan a saan a nangirwar ti Korte Suprema ti Temporary Restraining Order (TRO) a kiniddaw ni Dela Rosa iti tengnga ti arrest warrant manipud International Criminal Court (ICC).
