BR LA UNION – Posible ita nga aldaw ti Lunes ket agbaliw manen iti liderato ti Senado kagiddan ti panagsubli ti sesyon, kalpasan nga inwaragawag ni Senate President Alan Peter Cayetano a maipagarop nga adda agtigtignay tapno mapatakyas isuna iti puwesto.
Iti maysa a press conference, imbaga ni Cayetano nga adda ti maipagarop a gandat a “kudeta” kontra iti liderato na idiay Senado.
Kinuna na nga adda dagiti senador a maipagarop a maal-allokoy a sumurot iti grupo ti minorya nga idaulwan ni Senate Minority Leader Vicente “Tito” Sotto III.
Maipalagip a 13 a senador ti nagbotos tapno maipatugaw ni Cayetano iti puwesto, bayat a siyam met ti simmuporta kenni Sotto. Bayat nga isuda Sen. JV Ejercito ken Juan Miguel Zubiri ket nag-abstain iti binnotosan.
Nu kumappon iti minorya dagiti dua a nag-abstain ken maallokoy pay iti dua a senador manipud iti agdama a mayorya, mabalin a makabukel da ti baro a “Magic 13” nga umdas tapno makaisayangkat ti baro a panagbaliw iti liderato ti Senado.
Kabayatanna, nainget a pinaglibakan ni Senator Francis “Kiko” Pangilinan dagiti ispekulasyon nga adda pakainaiganna iti maipagarop a baro a kudeta iti liderato ti Senado, ken inlawlawag na nga awan ti panggep na nga agbalin a Senate president.
Maibasar iti report, sumagmamano a senador ti maipagarop a saan a mangapreciar iti estilo ti panangidaulo ni Cayetano ken mapagdudua-an nu kabaelanna a pagkaykaysaen ti Senado iti nabatbati a tawen ti administrasyon ni Presidente Ferdinand “Bongbong” Marcos Jr.
