BR LA UNION – Kiniddaw ti Office of the Ombudsman iti Sandiganbayan a mangiruar ti precautionary hold departure order kontra kada Senador Rodante Marcoleta, sigud nga Anakalusugan party-list Rep. Mike Defensor, ken dua pay a negosyante seknan iti maipagarop a P75 million campaign donation para iti kandidatura ni Marcoleta idi 2025 elections.
Maibasar iti rekomendasyon dagiti field investigator ti Ombudsman, rumbeng a maidatagan ti kaso a plunder ken indirect bribery da Marcoleta, Defensor, negosyante a ni Joseph Varias Espiritu, ken Aristotle Baluyut Viray.
Segun kadagiti imbestigador, maipagarop nga immawat ni Marcoleta iti pakabuklan a P75 million campaign donations iti tallo a nagduduma nga aldaw a maibilang a “gift” ngem maysa daytoy a panagkunniber wenno plunder iti sidong ti anti-graft laws.
Maak-akusaran pay ni Marcoleta a saanna nga indeklara dagiti kantidad ti kuwarta a naawat na iti 2025 Statement of Assets, Liabilities, and Net Worth (SALN).
Naamwan a naisumiten iti Seventh Division ti Sandiganbayan iti kadawatan ti Ombudsman idi kalman, Lunes, Mayo 25.
Nupay kasta, awan pay ti inruar a pinal a resolusyon iti Office of the Ombudsman tapno aprubaran iti pormal a panangidatag ti kaso kontra kadagiti respondent.
Kabayatanna, pinaglibakan ni Marcoleta dagiti alegasyon iti privilege speech na idi kalman, Lunes.
Segun iti senador, maipagarop a politically motivated dagiti reklamo a naidatag kontra kenkuana.
Impaganetget ni Senador Marcoleta a dagiti kaso na ket panggep laeng a pagulimeken isuna kadagiti ibut-butaktak na seknan iti maipagarop nga anomalya iti flood control projects ken iti umadanin nga impeachment trial ni Vice President Sara Duterte.
