Nagsapatan ni Davao City Accountant Vingelin Bajan kas maikatlo a testigo iti depensa ti maika-41 nga adlaw iti impeachment trial ni Bise Presidente Sara Duterte.
Segun kenni defense counsel Lindon Bacquel, naipasango ni Bajan tapno paneknekan iti P64,194.72 nga imbayad iti lokal a gobierno ti Davao City kenni VP Sara idi tawen 2023 ket salary differential ken saan a double compensation.
Impasango ni Bajan dagiti payroll record a mangipakpakita iti salary differential a P31,718.64 para ti 2020 ken P32,476.08 iti tawen 2021, nga adda pakabuklan a P64,194.72. PInasingkedan na pay iti disbursement voucher a napetsaan iti Disyembre 30, 2022, a sumakop kadagiti dua a tawen.
Kinuna ni Presiding Officer Francis Escudero a naisagana iti disbursement voucher idi tawen 2022 kagiddan iti panagngato iti sueldo pata iti posisyon ti mayor idi 2020 ken 2021, bayat nga idi 2023 met ket aktuwal a naited iti bayad.
Kinumpirma daitoy ni Bajan ken inlawlawag nga Enero 10, 2023 laeng a nairuar iti tseke agsipud ta kasapulan da pay a makumpleto dagiti kasapulan a dokumento.
Innayon na a nangisubmitir metlaeng iti lokal a gobierno kadagiti supporting document sadiay Bureau of Internal Revenue mainaig kadagiti kompensasyon a naibayad.
Immanamong ni Bajan nga isuna ket indutok ni Duterte, idi mayora pay isuna, a kas city accountant idi tawen 2016, chairperson iti City Audit and Transition Teams for Barangay idi 2018, ken miyembro iti Investigating Committee ti Davao City idi 2020.
