Agtultuloy manen iti impeachment trial ni Bise Presidente Sara Duterte ita nga aldaw iti Martes, Nobyembre 10, 2026, para ti maika-41 nga aldaw iti proseso ti Senado kalpasan a maideklara ti quorum babaen iti panagdar-ay dagiti 13 senator-judges iti panangidaulo ni Senator-Judge Bam Aquino ti panangrugi a kararag.
Impasango iti defense team ti maikadwa a testigo da a ni Island Garden City of Samal Assessor Engr. John Kenneth Enumerables tapno mangipaay iti testimonya mainaig kadagiti sanikua ni Bise Presidente Sara Duterte ken ti asawa na a ni Atty. Manases Carpio.
Tarigagay iti depensa a paglibakan iti alegasyon ti prosekusyon a saan a naideklara ken biddut a deklarasyon ni VP Duterte iti Statement of Assets, Liabilities, and Net Worth (SALN) na seknan kadagiti sanikua idiay Samal, Davao del Norte.
Immunan a simmango idi kalman ti umuna a testigo iti depensa a ni Davao City Assessor Engr. Jaime G. Adalin, a binabalaw dagiti senador gapo iti panangtikaw na a sumungbat kadagiti damag ti biahe na idiay China.
Gapo kadaitoy ket dinamag met ni Senator-Judge Vicente Sotto III ni Presiding Officer Francis “Chiz” Escudero mainaig kadagiti pannusa a posible a maipaulog kadagiti indibidwal nga agsalawasaw iti sangwanan ti impeachment court.
Inlawlawag ni Escudero a sumango iti contempt ti siasinoman nga agsalawasaw wenno mangipaay iti evasive answers, malaksid pay iti perjury case dagiti regular courts.
