Impadamag ti Philippine Embassy in Warsaw a natalged amin a Pilipino sadiay Ukraine kasaruno dagiti kabaroan manen a missile ken drone strikes ti Russia idiay Kyiv a nakatayan dagiti uppat nga indibidwal ken nakadunoran pay ti nasurok-kumurang 100 a tattao.
Maipalagip nga inaramat ti Russia dagiti drones ken hypersonic Oreshnik intermediate-range ballistic missiles, a nangigubuay ti perdisyon kadagiti pagtaengan, pagadalan, merkado, ken maysa a museo idiay Kyiv.
Segun kenni Ukrainian President Volodymyr Zelensky, saan a nabaelan a lapdan ti air defense da amin a ballistic missiles isu a kaadwan ket nakastrek iti centro.
Iti biang met ti Russian Defense Ministry, ti panagraut da ket kas sungbat iti mapapati a panagbomba ti Ukraine kadagiti pang-sibilyan a pasilidad iti pagilian da, banag a nainget met a pinagkedkedan ti Ukraine.
