BR LA UNION – Sumangsango iti reklamo a plunder, graft, ken indirect bribery ni sigud a Senate President Francis “Chiz” Escudero idiay Office of the Ombudsman.
Daytoy ket kalpasan nga inrekomenda ti Field Investigation Office (FIO) ti Ombudsman idi Abril 16 ti panangidatag ti kaso kontra iti senador.
Nakailanad iti reklamo a maipagarop nga “indirectly received” ni Escudero ti aganay P306 million ken P280 million kas kickbacks manipud iti naduma-duma a flood control projects.
Naibasar ti reklamo iti testimonya ni sigud a Department of Public Works and Highways (DPWH) Undersecretary Roberto Bernardo, a nakairamanan ti maysa a Maynard Ngu a maipagarop a mediator ken bagman ni Escudero.
Maibasar iti dokumento, maipagarop a naaramid ti sumagmamano a delivery ti kuwarta kabilang ti P306-million transaction, P160 million ken P120 million idi 2024 ken 2025 babaen kenni Ngu.
Dagiti proyekto a maipagarop a naggapwan dagiti kickbacks ket idiay Metro Manila, Visayas, ken sumagmamano a probinsya iti Luzon.
Nainget met a pinaglibakan ni Escudero iti akusasyon.
Kinuna na nga awan ti imbaun na a Maynard Ngu nga agtignay para kenkuana, ken awan met ti maipagarop nga ebidensiya a mangpaneknek a nagawat iti nasao a kantidad ti kuwarta.
Kiniddaw ni Escudero idiay Ombudsman a saan nga ipaayan ti immunity ni Bernardo nga impaganetget na a “pinaka-guilty” kadagiti amin a mairamraman iti kaso.
Iti Office of the Ombudsman ti manamnama nga agdesisyon nu maidatag ti kaso idiay Sandiganbayan kontra iti mammanday linteg.
