BR LA UNION – Nagballaag ti Philippine Institute of Volcanology and Seismology (Phivolcs) a mabalin nga agtultuloy iti sumagmamano a lawas agingga ti maysa a bulan dagiti mapaspasamak nga aftershock kalpasan ti magnitude 7.8 a gingined a timmama idiay Sarangani idi agsapa kalman, Hunyo 8, 2026.
Segun iti Phivolcs, alas-7:37 ti agsapa a timmama iti napigsa a gingined idiay ili ti Maasim, Sarangani.
Iti naudi a listaan wenno datus, umaboten iti nasurok 135 nga aftershocks iti nailista ti ahensya, a ti kapigsaan ket magnitude 6.7.
Nupay kaadwan kadagiti aftershock ket nakapsot, imbaga ti Phivolcs nga adda posibilidad na a makapadas latta iti napipigsa a panagdayyeg kadagiti sumaganad nga aldaw.
Kagiddan daytoy, nabalakadan dagiti residente nga agnanaed asideg iti kabaybayan a dagus nga umakar nu adda irwar a ballaag dagiti otoridad.
Segun iti Phivolcs, saan a rumbeng nga urayen nga umasideg iti dalluyon sakbay nga umakar agsipudta kabaelanna ti umasideg iti uneg laeng ti sumagmamano a minuto.
Pagan-annaden ti ahensiya iti publiko a saan a dagus nga agsubli kadagiti babbalay wenno iti kabaybayan, uray nu babassit dagiti dalluyon agsipudta posible a dak-dakkel iti mapasamak a dalluyon.
Kabayatanna, agtultuloy ti panag-trabaho ti naduma-duma nga ahensya ti gobyerno para iti rescue ken relief operations.
Nabilin metten ti Department of Social Welfare and Development nga agsagana ti tulong para kadagiti apektado a residente ken siguradwen iti naurnos nga evacuation centers.
Nangisayangkat pay a dagus ti inspeksyon iti Department of Public Works and Highways kadagiti kalsada, rangtay, ken dadduma pay a kangrunaan nga imprastraktura tapno masiguro a natalged a madalyasatan dagitoy.
Suspendido pay laeng ti klase iti sumagmamano nga apektado a lugar bayat nga agtultuloy ti pannakaurnos ken pannaka-amiris iti sitwasyon.
Binalakadan ti Phivolcs dagiti residente a kitaen a nasayaat iti kondisyon ti babbalay sakbay nga agsubli nangruna nu adda Nakita a panagbirri kalpasan ti napigsa a gingined.
