BR LA UNION – Pinasagidan ni constitutional law expert Atty. Domingo ‘Egon’ Cayosa iti kunana a ‘kapit tuko’ idiay Senado.
Daytoy ket kagiddan ti agraraira a paksyon iti nangato a pagpandayan linteg nga ita ket mabing-bingay iti baetan ti Cayetano bloc wenno grupo dagiti senador nga idaulwan ni Sen. Alan Peter Cayetano ken Gatchalian bloc wenno grupo nga idaulwan ni Acting Senate President Win Gatchalian.
Segun kenni Cayosa, a sigud a nagserbi kas Integrated Bar of the Philippines president, ti agtultuloy a panangipapilit ni Sen. Alan Peter Cayetano kadwa na ti dadduma pay a senador iti Cayetano Bloc ket maysa a desperado a panaggandat ken panangipilit nga agtalinaed iti bileg idiay Senado.
Daytoy ket laksid kunana dagiti probisyon iti konstitusyon, dagiti nagbalin a desisyon ti korte, ken nabayagen a nailatag a Senate rules a pumabpabor iti liderato ni Gatchalian ngem maipagarop nga ipil-pilit a baliktaden ti Cayetano Bloc.
Gaputi dayta, adu ti maatalan agsipudta malaksid ti problema a sangsangwen dagiti umili a Pilipino, maitantan iti panangipasa dagiti napapateg a gakat a makatulong kadagiti Pilipino, confirmation iti pannakadutok dagiti adu nga opisyal, hearing, ken dadduma pay.
Segun iti beterano nga abogado, mas makatulong idiay Senado ken iti gobyerno ti Pilipinas no boluntaryo a bumaba iti puwesto ni Cayetano ken bay-an ti sup-suportaran ti ad-adu a senador a mangidaulo iti nasao a chamber.
Impaganetget ni Cayosa, a pudno a public service ti kasapolan idiay Senado saan ketdi a panagbalin a kapit tuko iti pwesto.
