Nasurok a sangaribo iti bilang dagiti kumpirmado a kaso ti Ebola idiay Democratic Republic of Congo, idinto a nasurok 250 dagiti pimmusay gapu iti agtultuloy a panagwaras ti sakit.
Segun kadagiti otoridad, addan nasurok a 1,000 iti nairekord a kaso ti outbreak a gapuanan ti Bundibugyo strain ti Ebola virus.
Dandani amin a kaso ket nairekord idiay Ituri Province iti amianan a daya a paset ti pagilian, nupay adda met dagiti kaso idiay North Kivu ken South Kivu. Dagiti tallo a probinsia ket pagtaengan ti mapattapatta a 15 milion nga umili.
Nagwaras metten iti virus iti kabangibang a pagilian nga Uganda no sadino nailista iti dandani 20 a kaso ken dua a pannakatay. Nupay kasta, agtaltalinaed a kontrolado iti sitwasyon ti pagilian.
Segun iti World Health Organization, ti agdama a panagraira ket gapuanan ti Bundibugyo strain ti Ebola, nga awan pay ti naaprobaran a bakuna wenno espesipiko nga agas.
Gapu iti daytoy, agtultuloy nga ikagkagumaan dagiti eksperto a lapdan iti panagwaras ti sakit ken padasen dagiti posible a panagagas.
Maipalagip nga indeklara ti WHO iti outbreak kas Public Health Emergency of International Concern, bayat nga inpakdaar dagiti health expert a mabalin nga agpaut iti sumagmamano a bulan iti krisis no saan dagus a mapasardeng iti panagwaras ti virus.###
