Naangay ti press conference para iti Measles-Rubella Supplemental Immunization Activity (MIRSIA) 2026 idi kalman, Huebes, Hulio 2, 2026, idiay Bayview Hall, Legislative Building, Provincial Capitol ditoy Siudad ti San Fernando, La Union, kas panagsagana iti dakkel a kampania ti panagbakuna iti kamuras ken rubella ditoy probinsia.
Indauluan ti programa da Gobernador Mario Eduardo Ortega, Hon. Ruperto Rillera, Provincial Health Officer Dr. Herminigildo Velasco, ken Department of Health (DOH) Regional Director Dr. Helen Tobias, agraman dagiti dadduma pay nga opisial manipud iti sektor ti salun-at.
Panggep ti press conference nga ipakaammo iti publiko ti kinapateg ti MIRSIA 2026 ken paregtaen dagiti nagannak ken guardians a mangbakuna kadagiti annakda.
Segun iti DOH, ti supplemental immunization activity ket paset ti agtultuloy a panagregget ti gobierno tapno mapaadu ti lebel ti proteksion dagiti ubbing kontra iti kamuras ken rubella—dua a sakit a mabalin a malapdan babaen kadagiti natalged ken epektibo a bakuna.
Iti panagbitlana, inlawlawag ni Dr. Crisanto Montemayor, Pediatrician ken Bise Presidente ti Pediatric Society–Northern Luzon Chapter, a panggep ti kampania a magun-od ti herd immunity wenno community immunity, wenno umdas a bilang dagiti ubbing ti mabakunaan tapno malapdan ti napartak a panagwaras dagiti makaakar a sakit, partikular ti kamuras.
Naituding a maisayangkat ti nasao nga aktibidad iti intero a La Union manipud Agosto 10 agingga 26, 2026.
Segun iti Provincial Health Office, puntiria ti nasao a programa dagiti amin nga ubbing nga agtawen iti innem (6) agingga iti limapulo ket siam (59) a bulan wenno awan pay lima ti tawenda.
Kamaudianna, awawagan manen ti Department of Health ken ti Provincial Government of La Union ti amin a nagannak ken guardians a gundawayanda ti libre a bakuna ken siguraduenda a mabakunaan dagiti annakda tapno masalaknibanda iti kamuras, rubella, ken dadduma pay a sakit a malapdan ti bakuna.
