BR LA UNION – Kinontra ti kampo ni Senator Jinggoy Estrada iti plano ti prosecution nga ikkaten ni sigud a Department of Public Works and Highways (DPWH) Secretary Manuel Bonoan iti graft charge gaputi anomalya iti flood control.
Kabayatan ti hearing idiay Sandiganbayan Second Division, nangipila ti kampo ni Estrada iti panangkontra, sumagmamano laeng nga aldaw sakbay a nangisubmitir ti Office of the Ombudsman iti mosyon a mangikkat kenni Bonoan iti kaso ken amendaran ti kaso.
Segun iti prosekusyon, agserbi ni Bonoan a cooperative witness, saan laeng a kontra kenni Estrada, ngem ketdi kadagiti dadduma pay a karaman iti flood control anomaly nga im-imbestigaran ti Ombudsman.
Immuna a kwinestiyon ni Presiding Justice Geraldine Econg iti legalidad ti saan a panangiraman kenni Bonoan kalpasan a nakaswan daytoy.
Iti argumento ti prosekusyon, iti saan a panangiraman kenni Bonoan ket nakapauneg iti Rule 110, Section 14 ti Rules of Court, a mangipalubos kadagiti akusado nga agbaliw ti criminal information babaen ti formal amendment.
Nupay kasta, impaganetget ni Atty. Laurence Arroyo, abogado ni Estrada, a ti singasing a panagbalbaliw ket mangbaliw met iti teorya ti prosekusyon iti kaso.
Nakailanad ngamin iti orihinal nga impormasyon a nagkinnutsabo da Estrada ken Bonoan iti panangaramid ti nasao a krimen.
Dimmar-ay iti panagdengngeg ni Bonoan itay malem ti Martes, Hulyo 14, bayat a nakalugan ti wheelchair ken imbaga ti abogado na a makapad-padas daytoy ti panagsakit iti barukong.
