BR LA UNION – Napnuan kaipapanan iti pakabuklan nga State of the Province Address wenno SOPA ni La Union Governor Mario Eduardo C. Ortega, a naisayangkat idiay Speaker Pro Tempore Francisco Ortega Convention Center idi Kalman, Hulyo 28, 2026.
Nagpaut ti nasurok maysa nga oras iti panagbetla ti Gobernador ket imbinsa-binsa na dagiti nagapuanan ti administrasyon na iti uneg ti maysa a tawen, ken dagiti arapa-ap na pay para iti probinsya ti La Union.
Dagiti lima a kangrunaan nga inikkan na ti importansiya ket iti economic development, social development, infrastructure development, environmental ken disaster resilience, agraman institutional development.
Impaganetget ti Gobernador a saanna a maaramid amin dagitoy a tarigagay nu awan ti suporta dagiti pada na nga opisyal ti probinsiya, amin a munisipiyo ken siyudad ti San Fernando ken dagiti stakeholders.
Inbingay pay ti Gobernador dagiti plano ti administrasyon na a pakaibilangan iti: Prioritization of district hospitals, Philippine Forestry Development Project, La Union Health Hub, San Fernando International Seaport, Bungol Demonstration Farm Projects, TPLEX Extension, San Juan Tourism Complex ken Community Kitchen.
Sakbay ti SOPA, pormal a naglukat ti maika-57 a Regular Session ti Sangguniang Panlalawigan nga indauluan ni Vice Governor Erick Sibuma a nagserbi kas presiding officer.
Dimmar-ay met iti SOPA 2026 dagiti Provincial Officials, Municipal Officials, amin nga barangay kapitan iti intero a probinsiya, SK officials kasta met dagiti Regional ken Provincial Directors manipud naduma-duma nga ahensya ti gobyerno, uniformed perssonnels, non government organization, business ken media sectors ken dadduma pay.
Nagleppas ti State of the Province Address ti Gobernador babaen iti panagyebkas na iti sarita a “Bannog Tayo amin Daytoy, La Union Agkaysa”.
