Mangrugi inton Setyembre 1, pairuten ti Land Transportation Office (LTO) iti operasyon kontra kadagiti motorista ken agararamid dagiti improvised wenno replica license plates a saan nga otorisado.
Segun kenni LTO chief Assistant Secretary Markus Lacanilao, matiliw dagiti motorista a mangusar ti peke wenno eksakto a tinulad a plaka ti LTO.
Kasapulan met nga adda ti authorization manipud LTO iti siasinoman a mangususar ti improvised plate.
Malaksid kadagiti motorista, target met ti operasyon dagiti agararamid ken aglaklako dagiti ilegal a replica plate, kas kadagiti mangal-allukoy iti online.
Dagiti matiliw nga agususar ti improvised plate nga awanan ti otorisasyon ket mabalin a kumpiskaren wenno i-impound dagiti lugan da, malaksid par iti ₱5,000 a multa. Alaen met ti LTO dagiti peke a plaka.
Segun iti LTO, mabalin nga usaren dagiti kriminal dagitoy a plaka tapnu mailemmeng iti pakabigbigan dagiti lugan da.
Makitintinnulong metten iti ahensya ti Philippine National Police (PNP) tapnu maamwan dagiti adda ti likudan iti ilegal nga aramid.
Para kadagiti naawanan ti plaka, kasapulan nga agsubmitir ti affidavit of loss ken ag-apply iti LTO para ti duplicate plate.
Nu naaprubaran, mabalin nga ikkan ti otorisasyon a mangusar ti temporario nga improvised plate.
