Binaliwan ti University Athletic Association of the Philippines (UAAP) iti schedule ti Season 89 basketball ita a Setiembre tapno ikkan-dalan iti pannakipaset dagiti sumagmamano nga student-athletes kadagiti international competitions kadua iti Gilas Pilipinas.
Lima a gamedays laeng iti naikeddeng manipud Setiembre 13 agingga iti 30, mainaig iti FIBA 3×3 U23 World Cup idiay Wuhan, China, Septiembre 15–19, ken ti 20th Asian Games idiay Nagoya, Japan, Setiembre 19 agingga Oktubre 4.
Mangrugi ti Season 89 inton Setiembre 12 iti SM Mall of Asia Arena, idinto a malukatan ti men’s basketball iti sumaruno nga aldaw iti Smart Araneta Coliseum iti nagbaetan ti Far Eastern University ken Adamson University, sarunuen ti De La Salle University kontra National University ken University of the Philippines kontra University of Santo Tomas.
Segun kenni Samahang Basketbol ng Pilipinas (SBP) Executive Director Erika Dy, napateg iti suporta ti UAAP tapno makapagserbi dagiti student-athlete iti national team a saanda a maisakripisio dagiti school commitments-da.
Kinuna ni UAAP Season 89 president Mark Molina nga agtultuloy ti panangsuporta ti liga kadagiti national teams ken nakasagana a mangbalbaliw iti schedule tapno maikkan dagiti atletada ti gundaway a mangibagi iti Pilipinas.###
