Nakatuding a mangipila iti National Bureau of Investigation (NBI) ti qualified human trafficking complaint kontra kenni Batangas 1st District Representative Leandro Leviste, sigud a Negros Oriental Representative Jacinto “Jing” Paras ken lima pay nga indibidual mainaig iti mapapati a “honeytrap” plot kontra kenni Executive Secretary Ralph Recto.
Pinasingkedan ni NBI Director Atty. Melvin Matibag nga idatag ti bureau iti reklamo iti Department of Justice (DOJ) kalpasan a makumpleto iti imbestigasyon. Segun kenni Matibag, nakita ti NBI dagiti elemento tapno pilaan ti qualified human trafficking dagiti pito nga indibidual.
Karaman pay kadagiti respondents ti talent manager nga agus-usar ti alias a “Ken” ken uppat nga abogado manipud iti Rondain ken Mendiola Law Firm, a maipagarup a nabilin a mangisagana dagiti statement kontra kenni Recto.
Maibasar iti imbestigasion, plano ti grupo nga usaren dagiti sumagmamano a babbai nga artista a mangaramid dagiti statements a mangakusar kenni Recto nga agus-usar ti illegal a droga ken makinanaig kadakuada, kas paset ti maipagarup a panaggandat a mangdadael iti reputasionna.
Pinaglibakan da Leviste ken Paras dagiti alegasion. Immuna a dimmar-ay iti abogado ni Leviste iti NBI ket impaganetget iti kalinteganna nga agulimek, idinto nga inlibak met ti kampo ti mammanday-linteg iti aniaman a pannakairamanna iti mapapati nga operasion.###
