Target ti House prosecution panel a malpas inton Setiembre 9 iti presentasion ti ebidensia mainaig ti Article I ti impeachment case kontra kenni Bise Presidente Sara Duterte, a mangdakdakamat iti biddut a panagusar, misappropriation ken iregular a liquidation ti ₱612.5 million confidential funds ti Office of the Vice President ken Department of Education.
Segun kenni House lead prosecutor ken Batangas Rep. Gerville “Jinky Bitrics” Luistro, ikagumaan ti prosekusion a malpas iti presentasion iti naituding a petsa, karaman iti panagusar ti stipulations iti depensa tapno mapapartak iti panagusig. Maysa kadagiti mabalin a saanen a sumango iti korte ni sigud a DepEd special disbursing officer Edward Fajarda gapu ti medical condition.
Kadagiti napalabas a panagdingngeg, karaman iti nagbalin a testimonia ni sigud a DepEd Undersecretary Michael Poa iti panangpasingked a ₱112.5 milyon confidential funds ti DepEd iti nairuar iti tallo a tig-₱37.5 million tranche ken naipadamag a naipasa kenni sigud a DepEd security officer Col. Dennis Nolasco. Pinasingkedan met ni Poa nga awan ti personal nga ammona iti aktual a panagusar dagiti pondo.
Kabayatanna, nakumpleton ti prosecution iti presentasion daytoy para iti Article IV mainaig ti maipagarup a panangipangta ni Duterte, bayat a saanda pay nga iruruar iti ebidensia para iti Article II maipapan iti unexplained wealth ken Article III maipapan iti bribery.###
