Dinepensaan ni private prosecutor Atty. Benjamin “Jay” Tolosa Jr. iti natured nga istilona iti impeachment trial ni Bise Presidente Sara Duterte, kasaruno ti nabara a sinnukat ti sarita iti panagdingngeg kenni sigud nga Education Undersecretary Michael Poa idi Setiembre 2.
Kenuna ni Tolosa nga agbalbaliw iti estratehiya ken demeanor ti abogado depende iti sitwasion ken adda dagiti gundaway a kasapulan nga agbalin nga assertive tapno mailaban iti posision ti prosekusion ken interest ti publiko.
Nagbalin a tensionado iti panagdingngeg idi inladawan ni Tolosa ni Poa kas “abogado nga awan ti ammona” mainaig ti ammo daytoy iti panagusar ti confidential funds ti Department of Education. Kinontra daytoy ni lead defense counsel Atty. Sheila Sison ken imbilin ni Senate President ken presiding officer Francis “Chiz” Escudero nga ikkaten iti waragawag iti rekord gapu ta saan daytoy a maiyannatup iti maysa a kapadana nga abogado.
Inlawlawag ni Tolosa nga awan ti panggep na a bastusen ni Poa ken dagiti waragawagna ket nakabasar iti sigud a testimonia daytoy maipapan iti confidential funds.
Kabayatanna, naideklara nga hostile witness ni Poa ti Senate Impeachment Court, a nangipaay kenni Tolosa ti karbengan nga agdamag ti leading questions, no la ket saan a misleading.
Laksid ti tension, kenuna ni Poa kalpasan iti panagdingngeg a nagbalin a patas iti proseso ken pinagyamanan ni Tolosa iti panangiggemna iti testimonia.###
