Nagpanawagan iti kampo ni sigud nga House Speaker ken Leyte 1st District Representative Ferdinand Martin Romualdez iti Ombudsman ti patas a proseso ken umdas a gundaway a makasungbat kadagiti baro nga alegasion kontra kenkuana mainaig ti flood control controversy.
Segun kenni Atty. Ade Fajardo, kayatda a maammuan dagiti waragawag ni sigud a DPWH Secretary Manuel Bonoan ken dagiti 28 a baro a testigo nga imbaga ti Ombudsman nga adda ti direkta ken material nga impormasion mainaig iti imbestigasion.
Idi Agosto 20, 2026, nagsubmitir ni Romualdez ti supplemental counter-affidavit iti Ombudsman, karaman dagiti nasapataan a salaysay ti 25 a sigud a driver ken security aide ni sigud nga Ako Bicol Representative Zaldy Co.
Nairaman met iti panangibabawi ni sigud a security aide Orly Guteza kadagiti immuna nga alegasionna kontra kenni Romualdez.
Impaganetget ti kampo ni Romualdez a dagiti panangibabawi dagiti testigo ket mangpakpakapsot kadagiti alegasion kontra iti sigud nga Speaker ken kiniddaw daytoy nga ibasura dagiti reklamo a plunder, graft, bribery ken money laundering.
Kabayatanna, kenuna ti Ombudsman a saan a nakasalalay iti imbestigasion iti maysa a testigo laeng ken addaan pay daytoy ti 28 a testigo nga adda ti direkta nga impormasion kadagiti transaksion a maim-imbestigaran.###
