Nalidem nga agparang ni sigud a Department of Education (DepEd) Special Disbursing Officer Edward Fajarda kas testigo ita a Lunes, Setiembre 7 iti impeachment trial ni Bise Presidente Sara Duterte kalpasan a nabalakadan nga aginana ti 30 nga aldaw gapu iti kondisionna iti salun-at.
Segun kenni House prosecutor Manila 3rd District Rep. Joel Chua, adda ti naipaulog a medical bulletin a mangirekrekomendar ti nasao a panawen ti panaginana para kenni Fajarda isu a saanen a maisalang iti panagdingngeg ita nga aldaw.
Gapu iti daytoy, kenuna ni Chua a baliwan ti prosecution tii estratehiada ken idatagda iti witness stand ni Philippine Statistics Authority Assistant National Statistician Marizza Grande.
Manamnama a talantanen ni Grande dagiti rekord ti PSA a mainaig dagiti indibidual a nakapanaganan kadagiti acknowledgement receipts a nausar iti panag-liquidate ti confidential funds, karaman dagiti pagam-amkan a fictitious individuals.
Kabayatanna, agtultuloy iti presentasion ti prosekusion iti Article 1 ti impeachment complaint, a mangdakdakamat iti maipagarup a biddut a panagusar, misappropriation, ken iregular a liquidation ti ₱612.5 million a confidential funds ti Office of the Vice President ken DepEd idi ni Duterte pay laeng iti sektretario ti ahensia.###
