Pormal nga inpila ti Office of the Ombudsman ti kaso ti plunder iti Sandiganbayan kontra kenni sigud nga House Speaker ken Leyte 1st District Representative Ferdinand Martin Romualdez, sigud nga Ako Bicol Party-list Representative Zaldy Co, ken dadduma pay mainaig iti maipagarup nga anomalia kadagiti flood control projects.
Maibasar iti supplemental complaint ti Ombudsman idi Hulio, naakusaran da Romualdez ken Co a maipagarup a nagkumplot a mangurnong ti mapattapatta a ₱56 billion ill-gotten wealth manipud 2022 agingga iti 2025 babaen ti maipagarup a panangyakar ken biddut a panangusar ti pondo ti pagilian ken panangawatd kadagiti di umiso a benepisio. Karaman pay kadagiti naireklamo a panaglabsing iti graft ken direct bribery.
Kabayatanna, impaganetget ti kampo ni Romualdez a rumbeng a maikkan isuna ti due process ken gundaway a mangsungbat iti aniaman a baro nga alegasion kontra kenkuana. Kiniddaw pay ti legal counsel-na a mapakaammuanda maipapan kadagiti statements ni sigud a Public Works Secretary Manuel Bonoan ken dagiti 28 a baro a testigo a maibagbaga nga addaan ti impormasyon iti nasao a kaso.
Nainget met a pinaglibakan ni Romualdez dagiti alegasion ken impaganetget nga awan ti pakainaiganna kadagiti maipagarup a kickbacks ken anomalia kadagiti flood control projects. Iti pannakaipila ti kaso ket saan a kaipapanan a napaneknekan a nagbasol dagiti akusado, gaputa maipasidong pay dagiti alegasion iti proseso ti korte.###
