Pimmusayen ni Jon Small, sigud a kadua iti banda, longtime collaborator ken nasinged a gayyem ti kumakanta a ni Billy Joel.
Naipadamag a pimmusay ni Small idi Setiembre 4, 2026. Pinasingkedan ni Joel iti ipapatayna babaen ti Instagram post a nakaitampokan dagiti retratoda a dua. Saan pay a nairuar ti makagapu iti ipupusay daytoy.
Nangrugi ti panagkadua da Small ken Joel iti musika idi dekada 1960 kas kameng ti The Hassles. Idi agangay ket pimmanawda iti grupo tapno mangporma ti hard-rock a duo nga Attila, a ni Small iti drums ken ni Joel iti keyboards ken vocals. Nangiruar iti grupo ti self-titled album idi 1970.
Nadadael iti panaggayyemda kalpasan a nagayat ni Joel ken ni Elizabeth Weber, ti asawa idi ni Small, nga idi agangay ket inkasar ni Joel idi 1973. Iti laksid ti panagsusupiat, nagkappia ken nagtrabahoda manen a dua iti panaglabas dagiti tawen.
Nagbalin ni Small a direktor ti music video ken konsierto ken nakatrabahona ni Joel kadagiti proyekto a kas iti “Uptown Girl,” “Keeping the Faith” ken “Tell Her About It,” kasta met dagiti sumagmamano a produksion ti konsierto. Nakatrabaho na pay dagiti dadduma a dadakkel nga artista a kas ni Garth Brooks, Reba McEntire, Run-DMC, ken Aerosmith.
Idi 2025, karaman ni Small kadagiti miembro ti The Hassles a naikabil iti Long Island Music and Entertainment Hall of Fame.###
