Impaganetget ti House prosecution panel nga adda ti maipagarup nga “elemento ti panangloko” iti pannakausar ti ₱612.5 million confidential fund iti Office of the Vice President ken Department of Education iti sidong ni Bise Presidente Sara Duterte.
Segun kenni Lanao del Sur Representative Zia Alonto Adiong, mapagduaduaan dagiti sumagmamano nga acknowledgment receipts gapu ta adda dagiti nagan nga awan ti katupagna a rekord iti Philippine Statistics Authority, pakairamanan dagiti menor de edad ken tattao a nabayagen a pimmusay.
Nakuestion met iti pannakausar dagiti sertipikasion manipud iti Philippine Army tapno suportaran iti liquidation ti confidential fund.
Segun kadagiti dua nga Army officers, dagiti certifications ket mangpaspasingked laeng iti pannakaangay ken pannakipasetda iti Youth Leadership Summit, ken saan a ti panagusar ti confidential funds ti DepEd.
Pinasingkedan ni sigud a DepEd Undersecretary Michael Poa nga awan ti naited a confidential funds ti DepEd iti Armed Forces of the Philippines para iti nasao a summit.
Kabayatanna, kinuna ti House prosecution a nalpasdan iti panangidatag ti ebidensia iti Article One, sakbay a napagsasaritaan iti alegasion maipapan iti unexplained wealth.###
