Suportado ti Department of Health (DOH) iti singasing a panangingato ti excise tax kadagiti sweetened beverages kas wagas tapno maksayan iti panagkonsumo kadagiti nasam-it a mainom ken ti mainaig nga health burden.
Segun kenni DOH Assistant Secretary Lester Tan, supsuportaran ti ahensia iti pannakaingato ti agdama a buis a ₱6 agingga iti ₱12 kada litro, depende iti klase ti sweetener.
Iti singasing ti Department of Finance (DOF), maipangato ti buis kadagiti nasam-it a mainom nga agus-usar ti caloric wenno non-caloric sweeteners iti ₱20 kada litro, idinto a ₱40 kada litro para kadagiti agus-usar ti high-fructose corn syrup. Karaman met iti singasing ti tinawen a five-percent adjustment.
Malaksid iti daytoy, insingasing pay ti DOF ti pannakapalawa ti sakup ti sweetened beverages tax tapno mairaman dagiti sumagmamano a produkto kas iti sorbetes ken frozen yogurt.
Iti agdama a TRAIN Law, nai-pegged iti ₱6 kada litro iti buis kadagiti inumen nga addaan caloric wenno non-caloric sweeteners ken ₱12 kada litro para iti high-fructose corn syrup.###
