Top 5 ni Engr. Louis Paolo P. Vicente manipud Barangay Quinavite, Bauang, La Union iti September 2026 Registered Electrical Engineer Licensure Examination, kalpasan a nakagun-od ti 93.15 percent rating.
Nagturpos isuna ti Bachelor of Science in Electrical Engineering iti Don Mariano Marcos Memorial State University–Mid La Union Campus kas Cum Laude.
Segun kenni Vicente, uppat a bulan laeng iti binusbosna a nagrepaso iti review center sakbay ti dua nga aldaw a licensure examination, no idilig iti gagangay nga innem a bulan a panagsagana.
Dakkel iti naitulong kenkuana ti kaadda ti naurnos nga eskediul ti panagadal, nangnangruna iti panangammo no ania dagiti asignatura a kasapulan nga ipamaysa.
Imbinglayna a maysa kadagiti nagbalin a giyana kadagiti Electrical Engineering subjects ket iti prinsipio nga “ayaten nga umuna dagiti numero sakbay nga agbalin a nalaing.”
Nagbalin nga inspirasion ni Vicente dagiti gagayyem a kaduana a nag-review, dagiti instructors iti kolehio a nang-mentor kanyana, ken ti pamiliana a mangipalpalagip nga agtalek iti bagi ken iti Dios.
Iti nasao a licensure examination, dimmanon ti 51 dagiti baro nga electrical engineers manipud iti DMMMSU–Mid La Union Campus, karaman ni Vicente.
Ti pannakastrekna iti Top 5 ket nangnayon kadagiti mabigbigbig a performance ti unibersidad iti Electrical Engineering licensure examination.
Kabayatanna, saanna nga irikrikep ti ridaw iti posibilidad a mangisuro iti DMMMSU–Mid La Union Campus iti masakbayan.
Iti agdama, agisagsagana ni Vicente dagiti requirements ken trainings iti panagrugi ti propesional a karerana.###
