Nairot a bambantayan ti National Capital Region Police Office (NCRPO) dagiti lugar idiay Metro Manila a manamnama a pakaisayangkatan dagiti tignay-protesta ita nga aldaw, Setiembre 21, kas pananglagip iti maika-54 nga anibersario ti deklarasion ti Martial Law.
Karaman kadagiti maipampamaysa dagiti sumagmamano a paset ti EDSA, EDSA Shrine, People Power Monument, Mendiola, Ayala Bridge, ken Liwasang Bonifacio. Nangisayangket met ti ocular inspection kadagiti kangrunaan a lugar idiay Maynila ni NCRPO Officer-in-Charge Police Brigadier General Christopher Abrahano kas panagsagana kadagiti rally.
Naka-full alert iti NCRPO ken agarup 17,085 a personnel iti nai-deploy idiay Metro Manila, karaman iti crowd dispersal management contingent ken kanayunan a puersa manipud kadagiti kaasidgan a rehion.
Nabilin met dagiti pulis a pagtalinaeden iti kinaurnos ken kinatalged ti publiko, bayat a raemen iti karbengan dagiti umili iti nakappia a panagtitipon.###
