Sangapulo ket dua a tattao ti natay ken 35 iti nasugatan kalpasan a bimtak ti lugan a napunno ti pampabettak iti Aman Mela joint checkpoint idiay Dera Ismail Khan, Khyber Pakhtunkhwa, Pakistan idi Setiembre 26.
Karaman kadagiti natay iti maysa nga opisial ti customs ken dagiti sibilian, idinto nga awan ti naipadamag a polis wenno soldado a karaman kadagiti natay.
Segun kadagiti otoridad, kalpasan ti panagbettak ket adda met ti napasamak a pammaltog, pakairamanan ti panangraut iti maysa nga ambulansia a mangibiahe kadagiti biktima iti ospital a nakatayan ti dua a rescue workers.
Ti Tehrik-e-Taliban Pakistan (TTP) iti nangibaga a responsable iti panagbomba. Agtultuloy iti imbestigasion dagiti otoridad gaputa agtalinaed a nangato iti tension ken pangta ti panangraut dagiti militante iti rehion.###
