BR LA UNION – Indauluan ti Department of Trade and Industry (DTI) Region 1 iti coffee tree-growing activity idiay Brgy. Amantok, San Gabriel, La Union idi kalman, Oktubre 1, 2026, kas paset iti panangrambak ti International Coffee Day.
Tarigagay ti aktibidad nga ipaganetget iti kinapateg ti sustainable coffee production iti panangpapigsa ti sektor ti agrikultura ken pagbiagan iti rehiyon.
Nagmula dagiti nakipaset ti 100 a puon ti Robusta coffee iti nasao a lugar.
Ti Robusta ket maysa kadagiti klase ti kape a gagangay nga agtub-tubo idiay Ilocos Sur.
Manamnama a makatulong daytoy nga inisyatiba iti panangidur-as ti produksiyon ti kape, panangsuporta kadagiti lokal a mannalon, ken panangpasayaat ti mas napapaut ken agtultuloy nga industriya ti kape iti Ilocos Region.
Kabayatanna, pormal met a pinasingkedan ti DTI Region 1, Department of Agriculture Regional Field Office 1 (DA-RFO 1), ken Highland Vegetable Farmers Association ti panagtitinnulongda babaen iti ceremonial signing ti Memorandum of Agreement (MOA).
Babaen iti daytoy, magun-od iti tarigagay dagiti ahensiya ken organisasyon a mapapigsa dagiti inter-agency ken community partnership iti panangpataud ti napaut a pagbiagan ken oportunidad iti komunidad, idinto a maysa iti industriya ti kape a potensiyal a makatulong iti panagdur-as ti agrikultura ditoy rehiyon.
